Mention de la pièce

Exiit edictum a Cesare Augusto ut describeretur uniuersus orbis. Hec descriptio prima facta est a preside Sirie Cirino, et ibant omnes ut profiterentur singuli in suam ciuitatem. Ascendit autem et Ioseph a Galilea de ciuitate Nazareth in Iudaeam, in ciuitatem Dauid, que uocatur Bethlehem, eo quod esset de domo et familia Dauid, ut profiteretur cum Maria desponsata sibi uxore pregnante. Factum est autem, cum essent ibi, impleti sunt dies ut pareret. Et peperit filium suum primogenitum, et pannis eum inuoluit, et reclinauit eum in presepio, quia non erat eis locus in diuersorio. Et pastores erant in regione eadem uigilantes, et custodientes uigilias noctis supra gregem suum. Et ecce angelus Domini stetit iuxta illos, et claritas Dei circumfulsit illos, et timuerunt timore magno et dixit illis angelus : Nolite timere, ecce enim euangelizo uobis gaudium magnum, quod erit omni populo, quia natus est uobis hodie Saluator, qui est Christus Dominus, in ciuitate Dauid. Et hoc uobis signum, inuenietis infantem pannis inuolutum, et positum in presepio. Et subito facta est cum angelo multitudo celestis militie laudantium Deum, et dicentium : Gloria in altissimis Deo, et in terra pax hominibus bone uoluntatis (A42, fol. 16v)