Mention de la pièce

In diebus illis, Stephanus plenus gratia et fortitudine, faciebat prodigia et signa magna in populo. Surrexerunt autem quidam de synagoga que appellatur Libertinorum et Cyrenensium et Alexandrinorum, eorum qui erant a Cilicia et Asia, disputantes cum Stephano. Et non poterant resistere sapientie, et Spiritui qui loquebatur. Audientes autem hec dissecabantur cordibus suis, et stridebant dentibus in eum. Cum autem esset Stephanus plenus Spiritu Sancto, intendens in celum, uidit gloriam Dei, et Ihesum stantem a dextris Dei. Et ait : Ecce uideo celos apertos, et Filium hominis stantem a dextris uirtutis Dei. Exclamantes autem continuerunt aures suas, et impetum fecerunt unanimiter in eum. Et eicientes eum extra ciuitatem, lapidabant. Et testes deposuerunt uestimenta sua secus pedes adolescentis qui uocabatur Saulus. Et lapidabant Stephanum inuocantem et dicentem : Domine Ihesu, suscipe spiritum meum. Positis autem genibus, clamauit uoce magna dicens : Domine, ne statuas illis hoc peccatum. Et cum hoc dixisset, obdormiuit in Domino (A42, fol. 19r)